काठमाडौं, जेष्ठ २० - अन्तर्राष्ट्रिय फुटबलमा सम्बन्ध विस्तारका लागि एएफसी र फिफा कंग्रेसलाई निकै महत्त्वपूर्ण मानिन्छ। यसपल्ट एसियाली फुटबल महासंघको निर्वाचनसहितको एएफसी कंग्रेस ३० अप्रिलमा बहराइनको मनामामा भयो। अन्तर्राष्ट्रिय फुटबल महासंघको फिफा कंग्रेस पनि २९ मेमा जुरिचमा सेप ब्लाटरलाई पाचौंपल्ट अध्यक्षमा निर्वाचित गर्दै सम्पन्न भयो। तर, हाल कार्यवाहक अध्यक्षको रूपमा अखिल नेपाल फुटबल संघ (एन्फा) को नेतृत्व गरिरहेका ललितकृष्ण श्रेष्ठ दुवै कंग्रेसमा सहभागी भएनन्।
२०५१ साल चैतमा एन्फा अध्यक्ष भएयता गणेश थापाले कुनै पनि एएफसी र फिफा कंग्रेस गुमाएका थिएनन्। उनी अहिले राष्ट्रिय तथा अन्तर्राष्ट्रिय फुटबल गतिविधिमा सहभागी हुन नपाउने स्थितिमा छन्। एएफसीका पूर्वाध्यक्ष मोहम्मद बिन हमामबाट पैसा लिएकोलगायत आर्थिक गतिविधिमा उनीमाथि फिफाको इथिक्स कमिटीले छानबिन गरिरहेको छ र उनी १९ जुन, २०१५ सम्म फुटबल गतिविधिमा सहभागी हुन प्रतिबन्धित छन्। त्यसैले उनलाई एएफसी र फिफा कंग्रेसमा सहभागी हुने अवसर थिएन।
यस्तोमा कार्यवाहक अध्यक्षको रूपमा एन्फाको नेतृत्व गरिरहेका श्रेष्ठ आफैं एएफसी र फिफा कंग्रेसमा सहभागी नहुनुलाई शंकास्पद रूपमा हेरिएको छ। एएफसीका ४६ र फिफाका २ सय ९ सदस्यमध्ये फुटबल संघका प्रमुख सहभागी नभएको एकमात्र देश नेपाल भएको अन्तर्राष्ट्रिय सञ्चारमाध्यमहरूले जनाएका छन्। १५ करोड डलर भ्रष्टाचार गरेको आरोपमा स्विस अधिकारीले अमेरिकी आग्रहअनुसार सात उच्च पदाधिकारीलाई पक्राउ र अध्यक्षमा ब्लाटरविरुद्ध प्रिन्स अलीको प्रतिस्पर्धाले चर्चा पाएको फिफा कंग्रेस शुक्रबार सकिएको थियो।
फिफा कंग्रेसमा एन्फाका केन्द्रीय सदस्य वसन्त अर्याल र रत्नकुमार श्रेष्ठ (तनहुँका अध्यक्ष पनि हुन्) तथा बाँके जिल्ला फुटबल संघका अध्यक्ष भोजराज शाही सहभागी भएका थिए। लामो समयदेखि एन्फाको कार्यसमितिमा निरन्तर रहँदै आएका वसन्तलाई मतदान अधिकार दिएर पठाइएको थियो। उनीसहित रत्न पदीय जिम्मेवारीमा नरहेका थापानिकट मानिन्छन्। भोजराज शाही भने केही अघिसम्म उपाध्यक्ष कर्माछिरिङ शेर्पासँग नजिक थिए। शेर्पासहित अर्का उपाध्यक्ष विजयनारायण मानन्धर र केन्द्रीय सदस्य पंकज नेम्वाङले एन्फामा भ्रष्टाचार भएको भन्दै संसद्को सार्वजनिक लेखा समिति र अख्तियार दुरुपयोग अनुसन्धान आयोगमा उजुरी गरेका थिए। एन्फका अर्का उपाध्यक्ष किशोर राई पनि शेर्पाकै समूहमा छन्।
विधानअनुसार साधारणसभामा ‘वरिष्ठ उपाध्यक्ष’को निर्वाचन नगरेपछि श्रेष्ठलाई कार्यसमितिले विधानमै नभएको ‘प्रथम उपाध्यक्ष’ बनाएको थियो। उनी थापाका विश्वासपात्र हुन्। र उनैलाई आफूलाई पदीय अधिकार स्थगन गर्न लेखा समितिले निर्देशन दिएपछि थापाले कार्यवाहक अध्यक्ष बनाएका थिए। त्यसयता श्रेष्ठ एसियन कपको दौरान अस्ट्रेलियामा भएको एएफसी भेलामा सहभागी भएका थिए। तर, त्यसभन्दा महत्त्वपूर्ण एएफसी र फिफा कंग्रेसमा भने गएनन्। दुवैमा महासचिव धीरेन्द्र प्रधानलाई पनि पठाइएन।
‘विद्रोही’ पदाधिकारीले एन्फाको सबै कार्य अहिले पनि थापाकै निर्देशनअनुसार सञ्चालन भइरहेको आरोप लगाएका छन्। दुवै कंग्रेसमा सहभागीलाई पनि थापाकै निर्देशनमा एन्फाले पठाएको उनीहरूको आरोप छ। यसबारे प्रतिक्रिया लिने प्रयास गर्दा कार्यवाहक अध्यक्ष ललितकृष्ण श्रेष्ठ सम्पर्कमा आउन चाहेनन्। तर, उनले एएफसी कंग्रेसमा आफू नगएकोबारे किइराड्नेज डटकमलाई प्रतिक्रिया दिँदै भनेका छन्, ‘सम्झौता (कम्प्रोमाइज) गर्नुपरेकाले साथीहरूलाई पठाइएको हो।’ तर, के सम्झौता भन्नेबारे प्रस्ट्याइएको छैन।
एएफसी कंग्रेसमा केन्द्रीय सदस्य पुरुषोत्तम अधिकारी (सर्लाहीका अध्यक्ष पनि हुन्), सहायक महासचिव मणि कुँवर र सहकोषाध्यक्ष रवीन्द्र जोशीले एन्फाको प्रतिनिधित्व गरेका थिए। त्यसमा मतदान अधिकार अध्यक्ष थापाका सालोसमेत रहेका मणिलाई दिइएको थियो। यी तीनमध्ये पुरुषोत्तम मात्र १७ सदस्यीय कार्यसमितिभित्रका हुन्। मणि र रवीन्द्र मनोनीत पदाधिकारी हुन् तर उनीहरू विधानअनुसार कार्यसमितिभित्र पर्दैनन्। पुरुषोत्तम र रवीन्द्र पनि थापानिकट हुन्।
एएफसी र फिफा कंग्रेसमा सहभागी ६ सहित थापानिकट पदाधिकारीको पछिल्लो समय विदेश यात्रा बाक्लिँदो छ।
बुटवल, जेष्ठ २० - नेपाल आर्मी बुटवलमा जारी १८ औं तिलोत्तमा गोल्ड कप फुटबल प्रतियोगिताको खेलमा मंगलबार सजिलै विजयी भएको छ। उसले धरान एफसी सुनसरीलाई ४–० ले हरायो।
बुटवल १३ देवीनगरस्थित एन्फा टेक्निकल सेन्टरमा भएको खेलको ५ औं मिनेटमा जितेन्द्र कार्कीले पेनाल्टीमा गोल गरेर आर्मीका लागि खाता खोलेका थिए। सुरुवातमै गोल गरेर हौसिएको आर्मीले पुरै खेलमा आफ्नो दबदबा कायम राख्यो। जसले गर्दा खेलअवधिभर धरान एफसीका खेलाडीले गोल गर्ने कुनै अवसरसम्म पनि पाएनन्।
आर्मीका लागि खेलको ३६ औं मिनेटमा नवयुग श्रेष्ठले फ्री–किकमा अर्को गोल गरे। खेलको ७० औं मिनेटमा नवयुगले नै दोस्रो गोल गरेर आर्मीलाई ३–० को स्थितिमा पुर्याए। खेलको ७८ औं मिनेटमा टंक बस्नेतले गोलकिपरलाई बिट गर्दै गोल गरेर आर्मीको जितलाई अझ फराकिलो बनाए। आर्मीका भरत खवासले भने गोल गर्न सकेनन्। उनी गोल गर्न पाएका अवसरबाट पनि चुके। रक्षात्मक रूपमा खेलेको धरान एफसीका तर्फबाट गोलकिपर पूर्ण च्याम्जोङ खेलको अधिकांश समय भरतमाथि केन्द्रित थिए। उनले नै भरतका तीनवटै गोलका अवसरलाई असफल पारिदिएका थिए। विजेता टिमका नवयुग श्रेष्ठ म्यान अफ दी म्याच घोषित भए।
आर्मीका प्रशिक्षक मेघराज श्रेष्ठले टिमबीच सामन्जस्य र अभ्यास बढी भएकाले सहज जित हात पारेको बताए। दर्शकहरूको हौसला र परिचित मैदानले पनि आर्मीको जितलाई सहज बनाएको थियो। उता हार बेहोरेको धरान एफसीका प्रशिक्षक सुवास श्रेष्ठले भने टिमबीचको तालमेलमा कमी र गर्मी हारको कारण भएको बताए।
सोल, जेष्ठ १५ - नेपालमा भूकम्पका कारण क्षतिग्रस्त भौतिक संरचनाहरूको पुनर्निर्माण र घरबारविहीनको पुनर्वासका लागि दक्षिण कोरियाली सांसदहरूले १ करोड ३२ लाख रुपैयाँ सहयोग प्रदान गरेका छन्।
उक्त रकम कोरियाली संसद्का सभामुख चुङ उइ ह्वाले बिहीबार एक कार्यक्रम गरी कोरियाका लागि नेपाली राजदूत कमानसिंह लामामार्फत कोरिया रेडक्रस सोसाइटीका अध्यक्षलाई हस्तान्तण गरेका थिए। एक सदनात्मक रहेको कोरियाली संसद्मा ३ सय सदस्य रहेका छन्।
सो अवसरमा सत्तारूढ सेन्युरी पार्टीका संसदीय दलका नेता यो सेङ मीन, विपक्षी दल एनपीएडीका नेता जोङ कुल, संसद्का महासचिव पार्क ह्योङ जुन र नेपाली दूतावासका उपनियोग प्रमुख राजाराम बर्तौला उपस्थित थिए।
अष्ट्रेलिया, जेष्ठ १५ - नेपाली मुलका ब्यवसायी शेष घले अष्ट्रेलियाका ९९औं धनी ब्यक्ति बनेका छन् । गतबर्ष १ सय ५०औं स्थानमा रहेका घले यसबर्ष ५१औं स्थान माथि उक्लन्दै यस सुचिमा आइपुगेका हुन् ।
अष्ट्रेलियाबाट प्रकाशित हुने आर्थिक पत्रिका बिजनेस रिभ्यु विक्लीले आज सार्वजनिक गरेको यसबर्षको सुचिमा उनी ५ सय २८ मिलियन डलरसहित उक्त सुचिमा अटाएका हुन् । गतबर्ष जम्मा ३ सय ३५ मिलियन मात्र सम्पती भएका घले दम्पतीको सम्पति एकबर्षमा १ सय ९३ मिलियन डलरले बृद्धि भएको छ । यसैगरि गतबर्ष १ सय ५१औं धनी ब्यक्तिको सुचिमा रहेकी उनकी श्रीमती जमुना गुरुङ समेत यसबर्ष १ सयौं धनी ब्यक्तिको नम्बरमा अटाएकी छिन् ।
‘यो तथ्यांक भनेको तलमाथि भइरहने हो । तर जे नतिजा आएको छ त्यसले प्रसन्नता नै दिएको छ ।’ नतिजा आएपछि कान्तिपुरसँग कुराकानी गर्दै घलेले भने– यो लगनशिलता र दिगो योजनाको प्रतिफल हो भन्ने मलाई लाग्छ ।’ आफ्नो नाम आउनु आफुहरुको लागि मात्र नभएर नेपालका लागि समेत राम्रो भएको उनले प्रतिक्रिया दिए । ‘यसले मलाई नेपालमा लगानी गर्न र थप काम गर्न प्रोत्साहन दिएको छ ।’ उनले ब्यवसायमा इमान्दार र उद्यमशिल भएर लागेको खण्डमा सफलता पाइने अनुभव सुनाए ।
सन १९९० मा बिद्यार्थी भिषामा अष्ट्रेलिया आएका घलेले शुरुका समयमा सामान्य बिद्यार्थी सरह नै काम गरेका थिए । आफ्नो मेहनतले यहाँसम्म आइपुगेका घलेको रियल स्टेट, मेलबर्न इन्ष्टिच्युट अफ टेक्नोलोजी लगायतका ब्यवसायिक क्षेत्रमा लगानी रहेको छ । उनको मेलबर्नमा रहेको उक्त इन्ष्टिच्युटमा मात्र करिब ३ हजार बिद्यार्थी अध्ययनरत छन् । हालका एनआरएन अध्यक्ष समेत रहेका घले करिब १ महिनासम्म नेपालमा रहेर भुकम्पपीडितहरुका लागि राहत वितरणमा समेत सक्रियतापुर्वका लागेका थिए ।
न्युयोर्क, जेष्ठ १६ - अमेरिका स्थित गैर आवसीय नेपाली संघ (एनआरएन), राष्ट्रिय समन्वय परिषदको नयाँ नेतृत्वले आफनो कार्यभार शुरु गरेको छ । हालै एक समारोहका बीच नवनिर्वाचित नेतृत्वले पदभार ग्रहण गरेको हो । डेढ महिना अघि सम्पन्न निर्वाचनमा पेशाले चिकित्सक रहेका केशव पौडेलले आफनो प्रतिद्वन्द्वीहरु माथि सहज विजय हासिल गरेका थिए । आफना पाँच जना प्रतिस्पर्धीहरु लाई पराजित गर्नेक्रममा डा. पौडेलले तीन हजार ६ सय २२ मत प्राप्त गरेका थिए । जुन सबै प्रतिद्वन्द्वीहरुको प्राप्त गरेको कुल मत भन्दा धेरै हो । निर्वाचित भएपनि बैशाख १२ गतेको नेपालमा गएको विनाशकारी महाभूकम्पका कारण पदभार ग्रहणको कार्यक्रम स्थगित गरिएको थियो ।
हालै सम्पन्न पदभार ग्रहण कार्यक्रममा निर्वाचन प्रमुख एवम कानुन व्यवसायी विनोद रोकाले अध्यक्ष डा. पौडेल लगायतका निर्वाचित पदाधिकारीहरुलाई पद तथा गोपनीयताको सपथ गराएका थिए । निर्वाचन मार्फत अमेरिकामा एनआरएन पदाधिकारीहरुको चयन भएको यो दोस्रो अवसर हो । यसअघि अन्तरिम कार्यकालका लागि निर्वाचन भएको थियो । यस पटकको निर्वाचनले डा.पौडेलको नेतृत्वलाई दुई बर्षका लागि छनोट गरेको हो । चिकित्साशास्त्र अध्ययन संस्थान महाराजगन्जका पुर्व विद्यार्थी नेता समेत रहेका पौडेल हाल न्यु मेक्सिको राज्यका लभलेस हेन्थ्य सिस्टमको निर्देशक पदमा कार्यरत छन् ।
अनलाईन र हुलाक सेवा मार्फत झण्डै एघार हजार मतदाताहरु रहेको निर्वाचनमा वरिष्ठ उपाध्यक्ष तर्फ कृष्ण पोखरेल, महासचिवमा तिल श्रेष्ठ र सचिवमा शंकर खड्का निर्वाचित भएका थिए । उपाध्यक्षका चार पदमा बन्दना कोइराला, रविना थापा, डिल्ली भट्टराई र रामचन्द्र पोखरेलले जिम्मेवारी पाएका छन् भने सहसचिवमा संगीता सिवाकोटी, कोषाध्यक्षमा वेद बस्नेत र सहकोषाध्यक्षमा प्रकाश सापकोटालाई निर्वाचनले चयन गरेको छ । 'बोर्ड अफ डाईरेक्टर' अर्थात सदस्यहरुको पदमा मोहन ज्ञवाली, गोमा सेन, सुर्य लम्साल, हरिशचन्द्र हमाल, विनोद तिवारी र शिवराज पौडेल निर्वाचित भएका थिए भने विष्णुमान प्रधान, गोबिन्द श्रेष्ठ, सतेन्द्र साह र सुशील रेग्मीलाई पनि निर्वाचनले सदस्यको जिम्मेवारी सुम्पिएको छ ।
नवनिर्वाचित अध्यक्ष डा. पौडेलले आफनो कार्यकाललाई अमेरिकामा छरिएका आप्रवासी नेपालीहरुलाई संगठित पार्ने लक्ष्य रहेको बताए । ईकान्तिपुर सँगको कुराकानीमा उनले भने' जे जस्तो रुपमा आफुलाई प्रस्तुत गरेपनि, विभिन्न संघ संस्था खोलेपनि, पहिलो कुरा हामी नेपाली हौं । संगठित भएर कर्मभुमि र मातृभुमि प्रति उतरदायित्व हुनु हाम्राे पहिलो उदेश्य हो ।' स्मरण रहोस हालै डा. पौडेलको नेतृत्वमा भुकम्प पिडितहरुका लागि एनआरएन अमेरिकाको चिकित्सकीय टोलीले नेपालमा गएर सेवा पुर्याएको थियो ।
न्युयोर्क, जेष्ठ २० - नेपाली मूलकी विद्यार्थी समानता श्रेष्ठको हत्याका अभियुक्तलाई अमेरिकी अदालतले ८५ वर्ष जेल सजाय तोकेको छ। भर्जिनिया ब्ल्याक्स वर्गस्थित मोन्टेगेमेरी सर्किट कोर्टले अभियुक्त जेसिका मिचेल इविङलाई उक्त सजाय तोकेको हो।
अभियुक्तलाई हत्या अभियोगमा ८० वर्ष एवं प्रमाण लुकाएको अभियोगमा थप ५ वर्ष जेल सजाय सुनाइएको हो। यद्यपि उनले ४५ वर्ष सजाय पूरा गरे उन्मुक्ति पाउने फैसलामा उल्लेख छ।
अदालतमा सोमबार आठ घण्टा लामो बहसपछि उक्त फैसला भएको स्थानीय खेम भट्टचनले कान्तिपुरलाई बताए। भर्जिनिया टेकमा जीवशास्त्र विषय अध्ययनरत २१ वर्षीया समानताको गत वर्ष फेब्रुअरीमा हत्या भएको थियो।
न्युयोर्क, जेष्ठ १९ - नेपाली मुलकी विद्यार्थी समानता श्रेष्ठको हत्याको अभियोगमा पक्राउ परेकी अभियुक्तलाई अमेरिकी एक अदालतले ८५ बर्षको जेल सजाय तोकेको छ । सोमबारको फैसलामा भर्जिनिया ब्ल्याक्स बर्ग स्थित मोन्टेगेमेरी सर्किट कोर्टले अभियुक्त जेशिका मिचेल ईविङलाई सो सजाय तोकेको हो । अभियुक्तलाई हत्याको अभियोगमा ८० बर्षको सजाय एवम प्रमाण लुकाएको आरोपमा थप पाँच बर्ष जेल सजायको फैसला भएको छ । यद्यपी अदालतको फैसलाका अनुसार उनले ४५ बर्षको सजाय पुरा गरे उन्मुक्ति पाउनेछिन् ।
अदालतमा सोमबारको आठ घण्टाको बहसपछि सो फैसला भएको स्थानीय खेम भट्टचनले ईकान्तिपुर लाई बताए ।
भर्जिनिया टेकमा जिवशास्त्र बिषयमा अध्ययनरत २१ बर्षीया समानता श्रेष्ठको गत बर्षको फेब्रुअरीमा हत्या भएको थियो । हत्याको आरोपमा प्रहरीले भर्जिनिया टेकमा अध्ययरत ईविङलाई पक्राउ गरेको थियो ।